Por que unha Semana da Ciencia?
Na sociedade de hoxe en día preténdese que o alumnado teña unha cultura cada vez máis ampla, pero non é posible aumentar indefinidamente o número de horas de clase para que se podan explicar na escola todo o que hoxe se considera que debe saber unha persoa culta. Tendo en conta a optatividade do ensino da ciencia, hai alumnado que remata a educación secundaria con moi pouca cultura científica mentres que a nova sociedade demanda non só unha colección de coñecementos senón tamén, e especialmente, a habilidade para buscar información e analizala. E por isto que tratamos de desenvolver actividades nas que os estudiantes se impliquen de xeito voluntario, facendo uso das técnicas de experimentación interactiva que tanto éxito teñen nos museos de ciencias.

Como se articulou?
Para convertir o ensino e aprendizaxe da ciencia nun verdadeiro xogo, o alumnado debe acercarse a ela dun xeito curioso e inquisitivo. Na compaña dun monitor, os visitantes percorren os grandes capítulos da física: mecánica, termodinámica, ondas, electromagnetismo sen formalismos nin ecuacións, as veces dun xeito sorprendente e/ou lúdico. O proxecto traducíuse nunha exposición de experimentos físicos e químicos que permitiran a calquera persoa entender os fenómenos e a súa explicación. A nosa intención era visualizar e explicar feitos cotiás coñecidos e familiares para todos dun xeito interactivo e lúdico. A exposición pretendía ser unha introducción á ciencia e, sobre todo, á súa aplicación na vida cotiá. Non se pretendía tanto incidir na parte teórica como na práctica ou manipulativa. É de salienta-la utilización de material sinxelo ou de fácil adquisición.
Nos Institutos IES A Xunqueira e IES de Poio realizáronse sendas semanas de ciencia e tecnoloxía. No curso 2003-2004 as experiencias presentadas recibiron un premio á innovación educativa por parte da Consellería de Educación e O.U. da Xunta de Galicia. Repetíuse o evento no curso 2004-2005 con novos experimentos. Aínda que houbo experiencias de física, química, bioloxía, xeoloxía e tecnoloxía, amosamos eiquí só as experiencias de física.
As exposicións foron moi ben acollidas. Na primeira edición a visitaron 1400 persoas e na segunda edición 1700 persoas de colexios e institutos da bisbarra.

Agradecementos
Os autores agradecen ás institucións que fixeron posible, coa súa colaboración, a realización das exposicións: aos Concellos de Pontevedra e Poio, ao IES de Poio, ao IES A Xunqueira de Pontevedra, á Consellería de Educación e O.U. e a todo o profesorado e alumnado que participou e contibuíu ao éxito das semanas.